Vatnaveiðin að komast á fullt!

Nú er einn besti tími vatnaveiðinnar að nálgast en hann er jafnan frá miðjum júní fram í ágúst. Þá er lífríkið komið á fullt og silungar synda nær landi í ætisleit.

Fín veiði hefur þó verið það sem af er sumri.  Elliðavatn hefur verið mjög áberandi enda búið að vera með eindæmum góð veiði þar, jafnt á urriða og boltableikjum.Við höfum heyrt af góðri veiði í Hlíðarvatni í Hnappadal, Hreðavatni, Baulárvallarvatni og Meðalfellsvatni. Óvenju rólegt hefur verið í Þingvallavatni í bleikjuveiðinni en þó einn og einn að fá vænar bleikjur þar og enn eru menn að setja í urriða þar. Sama má segja um Úlfljótsvatn, en þar hafa einnig verið að veiðast vænar bleikjur.

Vötnin fyrir norðan hafa einnig verið að gefa góða veiði en við höfum haft fréttir af fínni veiði í Ljósavatni, Vestmannsvatni og líka Svínavatni.

Við hvetjum veiðimenn til að fylla út veiðiskráningarformið okkar á netinu, en það má finna á veidikortid.is/veidiskraning.

Góða skemmtun í vötnunum í sumar!

Með veiðikveðju,

Veiðikortið

 

 

2021

Elliðavatn og Þingvallavatn opna á morgun!

Sumar er á næsta leiti. Margir veiðimenn byrja veiðitímabilið þegar sumardagurinn fyrsti gengur í garð, en þá hefst veiðitímabilið í Elliðavatnið ár hvert. Þingvallavatn opnar 20. apríl ár hvert og það vill svo skemmtilega til að það er einnig sumardagurinn fyrsti, þannig að bæði þessi vötn opna því fyrir veiði á morgun.

Elliðavatn:

Það hefur verið hlýtt síðustu daga og vatnið eru tilbúið. Veðurspáin er góð og hafa fiskar sést í vatninu.

Á sumardaginn fyrsta hefst veiðitímabilið í Elliðavatni. Af því tilefni bjóða Veiðikortið og Skógræktarfélag Reykjavíkur til veiðigleði kl. 10-14 fimmtudaginn 20. apríl við Elliðavatnsbæinn. Caddisbræðurnir Hrafn og Ólafur Ágúst ásamt Ólafi Tómasi í Dagbók Urriða veita leiðbeiningar og góð ráð og Skógræktarfélagið býður upp á gönguferð. Hressing í boði í tilefni dagsins – Allir velkomnir!
Dagskrá við Elliðavatnsbæinn:
Kl. 10 -14 Aðstoð við veiðimenn, leiðbeiningar og góð ráð er varða veiði í Elliðavatni.
Kl. 11 Caddisbræður og Ólafur Tómas – örnámskeið og fyrirlestur í Elliðavatnsbænum um vatnaveiði með áherslu á Elliðavatn.
Kl. 13 – 14 Gönguferð frá Elliðavatnsbænum um Heimaás.
Veiðimenn og unnendur Elliðavatns eru hvattir til að mæta og fagna komu veiðisumarsins. Þetta er einnig kjörið tækifæri fyrir nýliða til að kynna sér veiði í Elliðavatni. Veiðimenn geta keypt Veiðikortið eða dagsleyfi á staðnum.
Þú getur skoða viðburðinn á Facebook með því að smella hér:
Þingvallavatn:

Í Þingvallavatni hefur urriðaveiðin farið ágætlega af stað á þeim stöðum í vatninu sem hafa þegar hafið veiðar, þannig að veiðimenn ættu að geta farið með góðar væntingar austur í Þingvallasveit á morgun.

Við hvetjum veiðimenn til að senda okkur fréttir á morgun um ganga mála.

Athugið að gróður getur verið mjög viðkvæmur á vorin og því bera að gæta að viðkvæmum göngustígum.

 

Þeir sem eru með Rafræn Veiðikort – munið eftir að prenta út mynd af kortinu til að hafa í mælaborði birfreiðar til að létta lífið hjá veiðieftirlitinu.  Hér fyrir neðan er mynd af kortinu sem rafrænir korthafar geta nálgast með því að fylgja QR kóða tölvupóstinum. Ef einhver finnur ekki þessa mynd af kortinu sínu má gjarnan hafa samband við okkur með t-pósti.

 

Með sumarkveðju,

Veiðikortið

2023

Kleifarvatn – veiði hófst í morgun!

Í morgun hófst veiði í Kleifarvatni á Reykjanesi. Það er fallegur dagur og eflaust margir sem ætla sér að kíkja í vatnið í dag enda veðrið fallegt. Í vatninu er bæði falleg bleikja og von á vænum urriðum. Þeir sem sigta á urriðann mæta gjarnan seinnipartinn eða snemma á morgnana.

Við minnum veiðimenn á að skrá afla í veiðibók, en hægt er að skrá afla á netinu með því að fara á https://veidikortid.is/veidiskraning/ og þar er hægt að senda inn myndir af fiskum með skráningu.

Fréttir og myndir frá opnunardeginum væru vel þegnar á netfangið veidikortid@veidikortid.is

Einnig minnum við á að veiði er hafin í Hraunsfirði og Vífilsstaðavatni en veiðimenn hafa verið að fá ágæta veiði þar síðustu daga þrátt fyrir að hafa farið seint af stað. Meðalfellsvatn opnar svo 19.4 og Þingvallavatn og Elliðavatn 20. apríl sem er jafnframt sumardagurinn fyrsti.

Þeir sem ekki eru komnir með Veiðikortið geta keypt kortið rafrænt og fengið það beint í símann.

Einnig er hægt að kaupa stakan dag í vatnið með því að smella hér.

Með veiðikveðju,

Veiðikortið.

2023

Veiðitímabilið er handan við hornið

Þrátt fyrir óvenju kalt vor virðast vera hlýindi í kortunum fyrir næstu helgi.

Við munum fylgjast vel með hvort að ísinn á Vífilsstaðavatni muni hopa í tíma þannig að veiðimenn geti opnað tímabilið formlega næsta laugardag sem er 1. apríl.

Það eru hverfandi líkur á að önnur vötn verði tilbúin en vorið er á næsta leiti og veiðimenn þurfa vonandi ekki að bíða lengi eftir að vatnveiðin fari í gang.

 

Með kveðju,

Veiðikortið

2021

Veiðikortið 2023 væntanlegt!

Við kynnum með stolti Veiðikortið 2023. Það er væntanlegt innan fárra daga úr prentun þannig að það fer í dreifingu fljótlega.

Hítarvatn í Borgarfirði er komið aftur í Veiðikortið eftir fjarveru frá 2018 og eflaust margir veiðimenn sem gleðjast yfir því enda Hítarvatn eitt af vinsælustu veiðivötnum landsins.

Veiðikortið hefur verið vinsæl jólagjöf síðustu árin enda höfum við kappkostað við að hvetja veiðimenn og fjölskyldur til að njóta íslensks sumars við falleg veiðivötn. Með Veiðikortið í vasanum geta veiðimenn veitt í 37 veiðivötnum vítt og breitt um landið fyrir aðeins kr. 8.900.-

Við látum ykkur vita um leið og kortið er tilbúið til afhendingar, en hægt er að panta það strax á netinu og fá það sent frítt heim um leið og það verður klárt.

Rafrænt kort í Apple Wallet eða Google Smartwallet.
Búið er að setja upp rafrænt Veiðikort sem valkost fyrir þá sem kjósa frekar að hafa kortið í símanum og nálgast bæklinginn rafrænt í gegnum símann.  Rafræna kortið verður til að byrja með einungis selt á vefsíðu Veiðikortsins. Þeir sem ætla að gefa rafrænt Veiðikort geta prentað út QR kóða og laumað í jólapakkann.


Veiðikortið 2023

Hér fyrir neðan má sjá forsíðu bæklingsins fyrir Veiðikortið 2023.

Ljósmynd á korti og bæklingi: Kjartan Þorbjörnsson/Golli

Með jólaveiðikveðju,

Veiðikortið

2023 Fréttir VK2023

Hítarvatn aftur í Veiðikortið!

Það er gaman að segja frá því að Hítarvatn er komið aftur í vatnaflóru Veiðikortsins. Það eru margir veiðimenn sem eiga góðar minningar frá Hítarvatni og munu þeir eflaust kætast að geta kíkt aftur í vatnið. Það verður áhugavert sjónarspil að skoða skriðuna sem féll í Hítardal árið 2018, fyrir þá sem hafa ekki þegar séð hana, en hún stíflaði Hítará sem myndaði nýjan farveg framhjá skriðunni.

Hér má sjá upplýsingar um vatnið fyrir þá sem vilja kynna sér vatnið betur. Helstu breytingarnar eru að ekki skal koma við á bænum Hítardal á leiðinni upp að vatni eins og áður. Veiðimenn þurfa því að tryggja að þeir séu með Veiðikortið eða dagsleyfi við höndina áður en lagt er að stað uppeftir því ekkert farsímasamband er við vatnið.

Við tökum fagnandi á móti Hítarvatni og vonum að veiðimenn verði duglegir að stunda það næsta sumar!

Með veiðikveðju,
Veiðikortið

2022 Fréttir

Urriðadans í Öxará næsta laugardag!

Hinn árlegi Urriðadans í Öxará verður laugardaginn 15. október og hefst klukkan 14:00. Jóhannes Sturlaugsson hjá rannsóknafyrirtækinu Laxfiskum mun fræða gesti Þjóðgarðsins á Þingvöllum um urriðann í Þingvallvatni 20. skiptið.
Kynningin hefst við bílastæði P5 þar sem Valhöll áður stóð. Þaðan er gengið meðfram ánni upp undir Drekkingarhyl þar sem risaurriðar og aðrir minni verða skoðaðir og fjallað um lífshætti þeirra.
Gert er ráð fyrir því að kynningin taki um eina og hálfa klukkustund og fá gestir tækifæri til að sjá risaurriðann í návígi og fræðast um þennan stórhöfðingja Þingvallavatns sem á hverju hausti gengur upp Öxará til hrygningar.
Góða skemmtun!
Veiðikortið
2022

Lokaútkall fyrir nokkur vatnasvæði!

Í dag, 15. september, er síðasti veiðidagurinn í mörgum vinsælum veiðivötnum eins og Þingvallavatni, Elliðavatni, Vífilsstaðavatni og Frostastaðavatni. Það er því um að gera fyrir veiðimenn að kíkja í veiði í dag áður en haustið skellur á. Búið er að vera fín veiði í Elliðavatni í allt sumar og mikið af urriða að sýna sig. Einnig hefur urriðaveiðin verið fín í Þingvallavatni en bleikjuveiðinþar frekar látið á sér standa.

Við viljum nota tækifærið og minna veiðimenn á að skrá veidda fiska í sumar hér: https://veidikortid.is/veidiskraning/

Daníel Karl Egilsson fór í Þingvallavatn í fyrrakvöld og fékk þennan væna urriða rétt undir myrkur!

 

Með kveðju,

Veiðikortið

 

2022

Veiðitúr á Skagaheiði – enn hægt að leigja hús

Skagaheiðin í landi Hvalness er vinsæll áfangastaður veiðimanna og jafnan góð veiði. Hægt er að veiða í 7 veiðivötnum og lækjum sem renna á milli vatnanna.  Það er búið að vera fín veiði þar í sumar.

Einnig er hægt að leigja veiðihús við vatnið en tvö hús eru við Ölvesvatn þar sem er gisting er fyrir 6-8 manns.  Við heyrum í Bjarna í Hvalnesi fyrir skömmu og þá var enn hægt að komast að í húsunum. Þeir sem vilja tryggja sér leigu  eða kanna með lausa daga er bent á að hafa beint samband við Bjarna Egilsson, í síma 893-7756 eða með því að senda tölvupóst á hvalnes730@simnet.is

Það er góður tími á heiðinni að nálgast en þegar líður á sumarið fer fiskurinn í meira mæli í lækina á milli vatnanna þar sem gaman er að egna fyrir þá með þurrflugu eða púpum.

Við vekjum athygli á því að á vatnasvæðið er takmarkaður fjöldi stanga, þannig að nauðsynlegt er að skrá komu sína áður en veiðimenn mæta á svæðið.

Með veiðikveðju,

Veiðikortið

 

 

 

 

2021

Veiðibrot í Hraunsfirði

Veiðibrot í Hraunsfirði

Við eftirlit í Hraunsfirði í dag varð veiðimaður uppvís að broti á veiðireglum, en um var að ræða netalögn sem veiðimaður hafði lagt í lónið. Þegar var haft samband við lögreglu sem fór í málið. Brot sem þetta verða ekki liðin í firðinum og mun svæðið vera undir auknu eftirliti hvað þetta varðar það sem eftir lifir sumars, en netalögnin sást úr eftirlitsflugi sem farið var yfir fjörðinn. Þess bera að geta að til staðar er eftirlit, bæði af hálfu veiðieftirlitsmanna sem og úr drónum og úr flugi.  Svona brot eru ákaflega sjaldgæf, sem betur er. Verði veiðimenn varir við brot af þessum toga, biðjum við þá að  standa með okkur og láta vita þegar í stað.

Hafið þá samband við Bjarna Júlíusson, veiðieftirlitsmann á svæðinu, í síma 693-0461 og brugðist verður við af fullum þunga.

Með veiðikveðju,
Veiðikortið

2022