Vel heppnuð sumarhátíð við Elliðavatn á sumardaginn fyrsta

Sumarhátíð var haldin við Elliðavatn á sumardaginn fyrsta í samstarfi Veiðikortsins, Stangaveiðifélags Reykjavíkur (SVFR), Skógræktarfélags Reykjavíkur og Veiðifélags Elliðavatns. Mikið var um að vera og fjölmenni mætti til að njóta dagsins við vatnið í góðri stemmningu.

Fjölskylda saman á Sumarhátið við Elliðavatn 2026

Strákarnir í Tökustöðinni, Caddis-bræðurnir Hrafn og Ólafur Ágúst ásamt Óla Urriða sáu um að fræða gesti yfir daginn, auk þess sem Örn Hjálmarsson og Geir Thorsteinsson stigu á svið og tóku þátt í dagskránni.

Gestir gæddu sér á grilluðum pylsum og sykurpúðum, kaffi og öðru góðgæti og var samveran við Elliðavatnsbæinn lífleg frá morgni og fram eftir degi. Fjölskyldur og vinir nutu þess að hittast, spjalla og fylgjast með lífinu við vatnið þar sem yngstu veiðimennirnir létu sig ekki vanta.

Gestir á sumarhátíðinni að fræðast um lífríkið og náttúruna í Elliðavatni

Nóg um að vera fyrir börnin

Fyrir börnin var skipulögð fjölbreytt dagskrá sem vakti mikla lukku. Þar má nefna vinsælan pödduratleik þar sem þátttakendur fengu að skoða smádýr úr vatninu og fræðast um lífríkið á skemmtilegan og lifandi hátt.

Óli Urriði (Ólafur Tómas) sýndi skemmtilega teiknimynd um Begga Blóðorm sem var afar vel tekið. Einnig fengu börn og fjölskyldur tækifæri til að prófa sig áfram með veiðistangir við vatnsbakkann og margir stigu sín fyrstu skref í veiði.

Ýmis önnur afþreying var í boði yfir daginn og mátti sjá líf og fjör víða um svæðið. Fræðsla um veiði og náttúru vakti áhuga gesta og var greinilegt að slíkur viðburður skapar góð tækifæri til að kynnast útivist og lífríki svæðisins.

fólk að veiða síli í Elliðavatni á sumarhátíðinni 2026

Árlegur viðburður sem er kominn til að vera

Sumarhátíðin hefur fest sig í sessi sem skemmtilegur vorviðburður fyrir fjölskyldur og veiðifólk og er frábært tækifæri til að kveðja veturinn og bjóða sumarið velkomið. Slíkar samkomur styrkja samfélagið, efla áhuga á útivist og skapa jákvæð tengsl við náttúruna.

Skipuleggjendur vilja þakka öllum sem mættu og tóku þátt í deginum, sem og samstarfsaðilum og sjálfboðaliðum sem lögðu sitt af mörkum til að gera daginn jafn vel heppnaðan og raun bar vitni.

Drengur grillar pylsur á sumarhátíðinni Við Elliðavatn
Feðgar brosa í myndavélina á sumarhátíðinni 2026
Gestir á Elliðabænum að hlusta á fræðslu um Elliðavatn
Stelpur með háfa að veiða síli á sumarhátíðinni 2026
Maður að veiða í Elliðavatni á sumarhátíðinni
2021 2026

Sumarhátið við Elliðavatn sumardaginn fyrsta

Veiðikortið, SVFR, Skógræktarfélag Reykjavíkur og Veiðifélag Elliðavatns standa fyrir sumarhátíð veiðimanna sumardaginn fyrsta, fimmtudaginn 23. apríl.

Dagskráin verður í höndum fræðslunefndar SVFR auk Skógræktarfélags Reykjavíkur þar sem margt skemmtilegt og fræðandi verður í boði fyrir börn og fullorðna.
Aðilar frá SVFR verða veiðimönnum innan handar og veita góð ráð milli 11-13. Hvetjum alla til að taka með sér veiðistangir. Þeir sem vilja taka þátt í skemmtilegum pödduratleik mega taka með sér krukku og sílaháf en eitthvað verður þó til á staðnum. Veiðifélag Elliðavatns býður upp á veiði í vatninu meðan hátíðin stendur yfir.

Dagskrá:

Kl. 10:00 – 11:00 Veiði og lífríki Elliðavatns
Caddisbræður og Óli Urriði verða með sína árlegu fræðslukynningu og umræðu. Sérstakir Elliðavatnssnillingar verða á svæðinu.

Kl. 11:00 – 12:00 Skógarþrautir
Skógarþrautir með Skógræktarfélagi Reykjavíkur. Varðeldur og sykurpúðar ef gróður verður ekki of þurr.

Kl. 12:00 – 13:30 Veiðihátíð krakkanna
Kl. 12:00 Fræðsluefni fyrir börn á myndrænu formi sem er unnið af Tökustuð.
Kl. 12:30 Lífríkið skoðað, léttur og skemmtilegur ratleikur við Elliðavatnsbæinn.
Kl. 13:00 Grillaðar pylsur.

Skemmtilegir leikir fyrir börnin með vinningum.

Hér er hlekkur til að skrá sig á viðburðinn á FB

Hér fyrir neðan eru nokkrar myndir frá því í fyrra.

2021 2026

Styttist í veiðitímabilið!

Það má segja að niðurtalning sé hafin í að veiðitímabilið 2026 fari af stað, en fyrstu vötnin opna formlega 1. apríl.

Hægt er að skoða töfluna yfir opnunartíma vatnanna til að sjá hvenær vötnin opna fyrir veiði.

Vinsælustu vötnin 1. apríl hafa verið vötnin í nágrenni höfuðborgarsvæðið eins og Vífilsstaðavatn og Hraunsfjörður á Snæfellsnesi en nauðsynlegt að kanna áður hvaða vötn eru ekki ísilögð. Nýja svæðið í Þingvallavatni, Hagavíkin, opnar fyrir veiði 1. apríl og er líklegt að svæðið muni njóta vinsælda í sumar, en þar má reyndar aðeins veiða á flugu.

Nú er því rétti tíminn til að fara að undirbúa veiðigræjurnar, taka til í veiðidótinu og kanna hvort vöðlurnar leki nokkuð eftir veturinn.

2026 Fréttir News

Veiðikortið 2026 væntanlegt!

Veiðikortið 2026 kemur út á næstu dögum og því hægt að lauma því í jólapakka landsmanna.

Með Veiðikortinu má veiða í 38 vatnasvæðum vítt og breitt um landið fyrir aðeins kr. 9.900.- og rétt er að benda á að mörg stéttarfélög niðurgreiða kortið til sinna félagsmanna.

Litlar breytingar verða á vatnasvæðum á milli ára en Hagavík í Þingvallavatni bættist við síðasta sumar og er því nýtt í bæklingnum.

Rafræna Veiðikortið 2026 er nú þegar komið i sölu og hægt að kaupa hér rafrænt eða sem gamla góða plastkortið og fá það sent heim án aukakostnaðar í byrjun desember.

Veiðikortið kostar aðeins kr. 9.900 fyrir 2026. Það er ánægjulegt að geta boðið kortið á sama verði þriðja árið í röð!

Auðvelt er að kaupa rafrænt og fá það beint í símaveskið, hvort sem það er Apple Wallet eða Google Wallet.

Bækling Veiðikortsins 2026 prýðir urriða sem féll fyrir þurrflugu. Ljósmyndari er Kjartan Þorbjörnsson/Golli. Bæklingurinn er væntanlegur úr prentun á næstu dögum úr prentun en þeir sem vilja kynna sér efni hans geta nálgast rafræna útgáfu hér.

2025

Urriðadansinn á laugardaginn 4. október kl. 14.00

Árlegur urriðadans undir leiðsögn Jóhannesar Sturlaugssonar verður laugardaginn 4. október klukkan 14:00. Allajafna stendur viðburðurinn yfir í 90-120 mínútur.
Jóhannes Sturlaugsson hjá rannsóknafyrirtækinu Laxfiskum mun fræða gesti Þjóðgarðsins á Þingvöllum um urriðann í Þingvallavatni, lífshætti hans og almennan hag.
Kynningin hefst við bílastæði P5 þar sem Valhöll áður stóð. Þaðan er gengið meðfram ánni upp undir Drekkingarhyl. Þar verða risaurriðar og aðrir minni verða skoðaðir og fjallað um lífshætti þeirra.
Gestir fá tækifæri til að sjá urriðann í návígi og fræðast um þennan stórhöfðingja Þingvallavatns sem á hverju hausti gengur upp Öxará til hrygningar.
Jóhannes hefur haldið utan um vöktun á urriðanum í Þingvallavatni og aðra laxfiska víða um landið. Það er af nógum efnivið að taka enda er urriðinn og umhverfi hans að þróast hratt á þessum árum.
Þetta er viðburður sem þú hreinlega mátt ekki missa af!
2025

Hagavík við Þingvallavatn er nýtt veiðisvæði í Veiðikortinu!

Það er okkur sönn ánægja að segja frá því að Veiðikortið hefur samið við landeigendur um að Hagavík við Þingvallavatn er í boði fyrir handhafa Veiðikortsins.

Um er að ræða litla og fallega vík sem liggur rétt við veginn þegar ekið er frá Nesjavöllum í átt að Úlfljótsvatni. Margir veiðimenn hafa horft hýru auga á víkina enda má oft sjá fisk vaka í yfirborðinu.   Svæðið er sérlega aðgengilegt.  Við biðjum veiðimenn að fara varlega þar sem stór hluti af svæðinu er rétt við veginn.

Við treystum því að veiðimenn gangi vel um svæðið og að þeir virði veiðimörk sem eru við girðingu að vestanverðu og við læk að austanverðu. Sjá kort.

Hagavík er kærkomin viðbót fyrir veiðimenn eða fjölskyldur sem vilja komast á frábært veiðisvæði stutt frá höfuðborgarsvæðinu. Einng er kjörið að samnýta veiðitúr í Þingvallavatn og Úlfljótsvatn enda aðeins örfáir kílómetrar á milli veiðisvæða.  Fín bleikjuveiði hefur verið í víkinni síðustu daga.

Nánari upplýsingar um svæðið með því að smella hér.

Með veiðikveðju,

Veiðikortið

2025

Ekki missa af þessum tíma!

Þessa dagana hefur Elliðavatn skartað sínu fegursta. Vatnið virðist vera fullt af fiski og fiskar að vaka nánast hvert sem litið er. Ástæða þess er góð veðrátta og fiskurinn sækir í púpur sem eru að klekjast út.

Það er sem sagt eitt besta tímabil í gangi núna til að njóta Elliðavatn og við hvetjum veiðimenn til að láta ekki þennan tímaramma framhjá sér fara.

Við minnum veiðimenn einnig á að vera duglega að skrá afla á veidikortid.is/veidiskraning

 

Góða skemmtun!

Veiðikortið

2025

Frábær sumarhátíð veiðimanna

Sumarhátíð við Elliðvatn

Í gær, sumardaginn fyrsta, var haldin sumarhátíð á vegum SVFR, Veiðikortsins, Skógræktarfélags Reykjavíkur og Veiðifélag Elliðavatn.  Fræðslunefnd SVFR sá um dagskrá fyrir veiðimenn og héldu Caddis bræður og Óli Urriði fróðlegan fyrirlestur um lífríki Elliðavatns strax á eftir kynningu frá Skógræktarfélagi Reykjavíkur. Örn Hjálmarsson og Geir Thorsteinsson kynntu hvor sína nálgun á sínar veiðiaðferðir og kynntu fyrir gestum þær aðferðir sem þeir nota við veiðarnar í vatninu á mismunandi tímum sumarsins.

Eftir veiðikynningu stóð Skógræktarfélagið fyrir skógarþrautum fyrir yngri kynslóðina auk þess sem í boði var að grilla sykurpúða yfir opnum eldi.

Krakkahátíð hófst um tólf með frumsýningu á fræðslumyndbandi eftir Ólaf Tómas eða Óla Urriða eins og hann er gjarnan nefndur. Í myndabandi var Beggi rannsóknar – blóðormur sögumaður og kynnti fyrir krökkunum hvernig lífríkið virkar eins og fyrir fimm ára.

Því næst var farið í ratleik sem tókst gríðarlega vel.  Krakkarnir voru spenntir og gripu með sér sílaháf og fóru á bakka Elliðavatns í leit að skordýrum sem þau settu í krukku og gátu skoðað þau í smásjá í framhaldi.  Mörgum foreldrum þótti leikurinn ekki síður spennandi!

Að lokum fengu gestir grillaðar pylsur þannig að enginn færi svangur heim.

Veiðin á opnunardeginum gekk framar vonum.  Veiðimenn fengu strax fiska upp úr klukkan sjö. Flestir fiskarnir voru vænir eða um 50 cm.  Ein væn bleikja koma einnig á land. Fínn lofthiti hefur verið á svæðinu síðustu daga, en í dag, fór hitinn upp í 15°.

Sumarið fer því sannarlega vel af stað og verður spennandi að fylgast með vatnaveiðinni á næstu dögum!

2025

Sumarhátíð við Elliðavatn sumardaginn fyrsta!

Veiðikortið, SVFR, Skógræktarfélag Reykjavíkur og Veiðifélag Elliðavatns standa fyrir sumarhátíð veiðimanna.

Dagskráin verður í höndum fræðslunefndar og Ungmennafélags SVFR auk Skógræktarfélags Reykjavíkur þar sem margt skemmtilegt og fræðandi verður í boði fyrir börn og fullorðna.
Aðilar frá SVFR verða veiðimönnum innan handar og veita góð ráð milli 11-13. Hvetjum alla til að taka með sér veiðistangir. Þeir sem vilja taka þátt í skemmtilegum pödduratleik mega taka með sér krukku og sílaháf en eitthvað verður þó til á staðnum. Veiðifélag Elliðavatns býður upp á veiði í vatninu meðan hátíðin stendur yfir.

Dagskrá:

Kl. 10:00 – 11:00 Veiði og lífríki Elliðavatns
Caddisbræður og Óli Urriði verða með sína árlegu fræðslukynningu og umræðu. Sérstakir gestir verða Örn Hjálmarsson og fleiri Elliðavatnssnillingar.

Kl. 11:00 – 12:00 Skógarþrautir
Skógarþrautir með Skógræktarfélagi Reykjavíkur. Varðeldur og sykurpúðar ef gróður verður ekki of þurr.

Kl. 12:00 – 13:30 Veiðihátíð krakkanna

Kl. 12:00 Fræðsluefni fyrir börn á myndrænu formi sem er unnið af Óla Urriða.
Kl. 12:30 Lífríkið skoðað, léttur og skemmtilegur ratleikur við Elliðavatnsbæinn.
Kl. 13:00 Grillaðar pylsur.

 

Vinsamlegast kíkið á viðburðinn á FB – þar sem hægt er að skrá sig.

Gleðilegt sumar og góða skemmtun!

Smelltu til að sjá auglýsinguna betur.

2021