Author: admin

Risaurriði úr Kleifarvatni

Kleifarvatn geymir mikið af rígvænum urriðum sem og bleikju. Miroslav Sapina kíkti þangað í fyrradag (27.4) og fékk einn verulega vænan urriða í vatninu sem var 86 cm að lengd og 18 pund að þyngd! Fiskurinn hjá honum tók 28 gr Toby spún.

Nú hefur veiðin farið vel af stað í flestum vötnunum. Við heyrðum í veiðimanni áðan sem staddur er í þjóðgarðinum og var hann búinn að fá eina 48 cm bleikju og tjáði okkur að það væri mikið af bleikju að vaka sem eru mjög góðar fréttir þar sem hún virðist vera snemma á ferðinni.

Mk,

Veiðikortið

Hörku gangur í vatnaveiðinni!

Frábært veður og hörku veiði í vötnunum! Veiðimenn eru að fá hann í þjóðgarðinum á Þingvöllum, Hraunsfirði, Meðalfellsvatni og Elliðavatni.

Í Elliðavatni hafa ekki bara verið að gefa flotta urriða en Pawel Domitrz fékk 57 cm bleikju þar 25. apríl. Davið Jaronsson fékk einnig 52 cm urriða auk þess sem hann veiddi vel í Meðalfellsvatni.

Atli Bergmann fékk fínan urriða við Vatnskotið á Þingvöllum í gærkvöldi auk þess sem veiðimenn hafa verið að gera fína veiði þar síðustu daga og núna í morgun. Cezary hefur heldur betur veitt vel í þjóðgarðinum þar sem af er tímabils, en á einni viku hefur hann fengið 27 urriða og margir þeirra rígvænir og meðal annars 90 cm fiska eins og sjá má á myndinni hér fyrir neðan.

Flott veður og vötnin svo sannarlega tekið við sér þannig að það er um að gera að njóta blíðunnar og skella sér í veiðitúr!

Cezary með einn af 27 fiskum sem hann hefur fengið í þjóðgarðinum. 
Þessi fiskur er um 20 pund og 90 cm.
 

Pawel með fallega 57 cm bleikju sem hann fékk á hvítan spún.

David Jaronsson með fallegan urriða úr Elliðavatni.

Atli Bergmann með flottan urriða úr Vatnskotinu í gærkvöldi!

Með veiðikveðju,

Veiðikortið 

Þingvallavatn – Urriðinn er mættur!

Það má með sanni segja að urriðinn sé mættur í þjóðgarðinn á Þingvöllum. Cezary Fijalkowski er búinn að vera við veiðar þar í dag og gengið mjög vel.  Við höfum einnig heyrt af góðri veiði á öðrum svæðum og því má ætla að urriðinn sé kominn á góða hreyfingu í vatninu.

Read more “Þingvallavatn – Urriðinn er mættur!”

Þingvallavatn – urriðatímabilið er byrjað!

í dag, 20. apríl hefst formlega veiði í þjóðgarðinum á Þingvöllum. Veiðin hefur farið vel af stað á öðrum svæðum í Þingvallavatni sem hafa þegar opnað fyrir veiði þannig að við vonum það besta.

Við minnum á að fyrir landi þjóðgarðsins má aðeins veiða með flugu og öllum urriða skal sleppt aftur, en það gildir frá 20. apríl – 1. júní.

Góða skemmtun og endilega sendið okkur upplýsingar um gang mála á veidikortid@veidikortid.is

Hér er Rasmus Ovesen með fallegan urriða frá opnunardeginum 2015, en þá var keimlíkt veður og spáin segir til um í dag.
Þessi mynd er tekin við Leirutá í Lambhaga.

Með kveðju,

Veiðikortið

Kleifarvatn á Reykjanesi opnar á morgun!

Nú eru veiðivötnin að opna hvert af öðru. Á morgun, 15. apríl opnar fyrir veiði í Kleifarvatni á Reykjanesi. Vatnið er spennandi snemmsumarsvatn enda margir risaurriðar sem dóla í vatninu og er algengast er að þeir veiðist í apríl og maí. Í framhaldi opnar svo fyrir veiði í Meðalfellsvatni þann 19. og Þingvallavatni þann 20. apríl. Elliðavatnið opnar svo á sumardaginn, sem er 25. apríl í ár.

Varðandi bleikjuna þá segja fróðir menn að ef menn ætla að veiða í dýpinu þurfi gríðarlega langan taum, jafnvel 3-4 metra og draga hægt. Það á að vera árangursríkasta aðferðin í bleikjuveiðinni í Kleifarvatni í klettunum við Syðri-Stapa og Lambhagatanga.

Hér má nálgast nánari upplýsingar um Kleifarvatn.

Marcin með fallega bleikju 2017.

Með veiðikveðju,

Veiðikortið

Vatnaveiðin fer rólega af stað

Það er ekki hægt að segja annað en að vatnaveiðin hafi farið rólega af stað. Fyrstu dagar aprílmánaðar voru kaldir og buðu ekki upp á mikla silungsveiði. Margir hafa þó lagt leið sína í Vífilsstaðavatn og Hraunsfjörð, jafnan í skamma stund í senn vegna kulda. 

Það verður sumarlegra samt með hverjum deginum sem líður og strax í næstu má búast við að það verði orðið betra a.m.k hér á suðvesturhorninu.

Einnig styttist í að það opni fyrir veiði í Kleifarvatni (15. apríl) og Meðalfellsvatni (19. apríl). Einnig bíða veiðimenn sem sækja í stórurriðann á Þingvöllum með öndina í hálsinum, en þar hefjast veiðar 20. apríl.  Elliðavatnið fer í gang á sumardaginn fyrsta þannig að biðin er að styttast og við hlökkum til að fá fregnir af veiðimönnum í sumar og hvetjum ykkur til að senda okkur fréttir og myndir í sumar til að deila með öðrum veiðimönnum.

Það styttist í að silungsveiðimenn geti farið að skunda á Þingvelli og reynt við bleikju og urriða.

Með kveðju,

Veiðikortið

Veiðitímabilið er handan við hornið!

Veiðitímabilið í vatnaveiðinni hefst formlega 1. apríl. Það þarf því ekki að telja lengi niður í að veiðimenn geti farið að renna fyrir silung. Veðrið síðustu daga og aukin birta fær óhjákvæmlega veiðimenn til að koma út úr vetrarhýðinu og kíkja á og yfirfara veiðigræjurnar.  Það verður spennandi að sjá hvernig veðurfarið verður í byrjun apríl en vonandi verður hlýtt og gott þannig að upphafið á veiðitímabilinu verði skemmtilegt.

Read more “Veiðitímabilið er handan við hornið!”