Þingvallavatn
Það hefur verið mjög fjölmennt á bökkum Þingvallavatns síðustu kvöld en margir vilja freista þess að setja í þann stóra. Flest kvöld vikunnar er búið að vera fjölmennt í Vatnskoti og veiðimenn að slíta upp einn og einn stórfisk. Það er svo magnað með urriðann á Þingvöllum að þegar menn veiða 5 punda urriða liggur við að hann sé flokkaður sem „tittur“ miðað við hvernig fiskar hafa verið að koma á land þar síðustu daga. Það má ætla að búið sé að veiða mörg hundruð urriða úr Þjóðgarðinum sem eru um og yfir 10 pund!
Benedikt Þorgeirsson fékk þennan fallega urriða í Ölfusvatnslandi sunnanmegin í Þingvallavatni sem hann svo sleppti eins og sjá má í myndbandi sem hægt er að horfa á með því að smella á myndina hér fyrir neðan.
![](https://veidikortid.is/wp-content/uploads/2013/05/BenniMedUrrida.jpg)
Smelltu á myndina hér fyirr ofan til að sjá Youtube myndbandið. Benedikt Þorgeirsson með flottan urriða.
Rögnvaldur Rögnvaldsson hefur verið duglegur að fara í Þingvallavatnið og er hann búinn að landa 14 urriðum. Stærsti fiskurinn sem hann fékk var tæplega 18 punda fiskur. Sá fiskur var vigtaður og mældur 86 cm og 46cm í ummál áður en honum var sleppt aftur út í vatnið. Flesta fiskana hefur hann fengið á flugur sem hann hefur hnýtt sjálfur. Sjá myndir fyrir neðan af nokkrum urriðum.
Flottur Þingvallaurriði sem Rögnvaldur veiddi fyrir skömmu.
Annar fallegur urriði sem féll fyrir flugum Rögnvaldar.
![](https://veidikortid.is/wp-content/uploads/2013/05/175_P_vor_2013_ingvllur.jpg)
Þessi er þykkur.
Verið að sleppa stórurriða eftir góðan bardaga. Hann er eflaust frelsinu feginn.
Hvað ætli þessi verði stór næst þegar hann veiðist næst! Veiða, mynda, sleppa!
![](https://veidikortid.is/wp-content/uploads/2013/05/kevin_urridi_thingvellir_mai2013.jpg)
Kevin Sevilla fékk flottan 9 punda urriða þann 5. maí í þjóðgarðinum á fluguna Blue Fox #4.
Halldór Gunnarsson fékk hrikalega flottan urriða á hvítan Nobble sem var 78cm. Væntanlega 12-13 punda fiskur í það minnsta enda hnausþykkur. Hann fékk einnig tvo aðra sem voru aðeins minni og fengu þeir allir að synda aftur í vatnið.
![](https://veidikortid.is/wp-content/uploads/2013/05/Urridi15pundHalldorGunnarsson.jpg)
Halldór Gunnarsson með fallegan urriða sem fékk líf að loknum miklum bardaga. Fiskurinn tók hvítan Nobbler.
![](https://veidikortid.is/wp-content/uploads/2013/05/birgirGudmunds.jpg)
Birgir Guðmundsson er búinn að vera duglegur að veiða. Hann er búinn að fá 4 flotta urriða í þjóðgarðslandi.
Birgir Guðmundsson með einn af 4 stórrurriðum sem hann er búinn að veiða í tveimur ferðum.
Það hefur sem sagt verið nóg að gerast í þjóðgarðinum og Ölfusvatnslandi og sömu sögu er að segja frá öðrum vatnasvæðum í Þingvallavatni. Nánast öll svæðin hafa verið að gefa frábæra veiði og þeir sem ætla sér að veiða stórurriða í ár ættu að hafa hraðann á þar sem þessir höfðingjar hverfa að mestu út í dýpið þegar það hlýnar frekar.
Rétt er að taka það fram að makrílveiði er stranglega bönnuð í þjóðgarðinum. Aðeins má veiða með flugu, maðk og spún. Einnig bendum við á að ekki er talið æskilegt að borða urriða sem eru stærri en 50cm þar sem kvikasilfursmagn í stórurriðanum hefur mælst hátt.
0 Comments