Hítarvatn aftur í Veiðikortið!

Það er gaman að segja frá því að Hítarvatn er komið aftur í vatnaflóru Veiðikortsins. Það eru margir veiðimenn sem eiga góðar minningar frá Hítarvatni og munu þeir eflaust kætast að geta kíkt aftur í vatnið. Það verður áhugavert sjónarspil að skoða skriðuna sem féll í Hítardal árið 2018, fyrir þá sem hafa ekki þegar séð hana, en hún stíflaði Hítará sem myndaði nýjan farveg framhjá skriðunni.

Hér má sjá upplýsingar um vatnið fyrir þá sem vilja kynna sér vatnið betur. Helstu breytingarnar eru að ekki skal koma við á bænum Hítardal á leiðinni upp að vatni eins og áður. Veiðimenn þurfa því að tryggja að þeir séu með Veiðikortið eða dagsleyfi við höndina áður en lagt er að stað uppeftir því ekkert farsímasamband er við vatnið.

Við tökum fagnandi á móti Hítarvatni og vonum að veiðimenn verði duglegir að stunda það næsta sumar!

Með veiðikveðju,
Veiðikortið

2022 Fréttir

Urriðadans í Öxará næsta laugardag!

Hinn árlegi Urriðadans í Öxará verður laugardaginn 15. október og hefst klukkan 14:00. Jóhannes Sturlaugsson hjá rannsóknafyrirtækinu Laxfiskum mun fræða gesti Þjóðgarðsins á Þingvöllum um urriðann í Þingvallvatni 20. skiptið.
Kynningin hefst við bílastæði P5 þar sem Valhöll áður stóð. Þaðan er gengið meðfram ánni upp undir Drekkingarhyl þar sem risaurriðar og aðrir minni verða skoðaðir og fjallað um lífshætti þeirra.
Gert er ráð fyrir því að kynningin taki um eina og hálfa klukkustund og fá gestir tækifæri til að sjá risaurriðann í návígi og fræðast um þennan stórhöfðingja Þingvallavatns sem á hverju hausti gengur upp Öxará til hrygningar.
Góða skemmtun!
Veiðikortið
2022

Lokaútkall fyrir nokkur vatnasvæði!

Í dag, 15. september, er síðasti veiðidagurinn í mörgum vinsælum veiðivötnum eins og Þingvallavatni, Elliðavatni, Vífilsstaðavatni og Frostastaðavatni. Það er því um að gera fyrir veiðimenn að kíkja í veiði í dag áður en haustið skellur á. Búið er að vera fín veiði í Elliðavatni í allt sumar og mikið af urriða að sýna sig. Einnig hefur urriðaveiðin verið fín í Þingvallavatni en bleikjuveiðinþar frekar látið á sér standa.

Við viljum nota tækifærið og minna veiðimenn á að skrá veidda fiska í sumar hér: https://veidikortid.is/veidiskraning/

Daníel Karl Egilsson fór í Þingvallavatn í fyrrakvöld og fékk þennan væna urriða rétt undir myrkur!

 

Með kveðju,

Veiðikortið

 

2022

Veiðibrot í Hraunsfirði

Veiðibrot í Hraunsfirði

Við eftirlit í Hraunsfirði í dag varð veiðimaður uppvís að broti á veiðireglum, en um var að ræða netalögn sem veiðimaður hafði lagt í lónið. Þegar var haft samband við lögreglu sem fór í málið. Brot sem þetta verða ekki liðin í firðinum og mun svæðið vera undir auknu eftirliti hvað þetta varðar það sem eftir lifir sumars, en netalögnin sást úr eftirlitsflugi sem farið var yfir fjörðinn. Þess bera að geta að til staðar er eftirlit, bæði af hálfu veiðieftirlitsmanna sem og úr drónum og úr flugi.  Svona brot eru ákaflega sjaldgæf, sem betur er. Verði veiðimenn varir við brot af þessum toga, biðjum við þá að  standa með okkur og láta vita þegar í stað.

Hafið þá samband við Bjarna Júlíusson, veiðieftirlitsmann á svæðinu, í síma 693-0461 og brugðist verður við af fullum þunga.

Með veiðikveðju,
Veiðikortið

2022

Risadagur í dag, 1. maí

Þeir eru margir veiðimennirnir sem horfa á 1. maí sem fyrsta veiðidaginn og byrja ekkert að veiða fyrr en sá dagur rennur upp.

Vorið hefur verið mjög hlýtt og gott og við höfum orðið vitni að snemmbúnu flugnaklaki síðustu daga. Veiðin hefur gengið mjög vel í þeim vötnum sem þegar hafa opnað fyrir veiði. Þá má því ætla að það sé langt síðan sumarið hafi farið jafn vel af stað og í ár.

Það eru fjölmörg vötn í Veiðikortinu sem opna ekki fyrir veiði fyrr en 1. maí en fyrir neðan er listi yfir þau vötn:

Vötn sem opna í maí

Vatn Opnar Lokar
Arnarvatn á Melrakkasléttu 1.maí 30.sep
Haugatjarnir í Skriðdal 1.maí 30.sep
Haukadalsvatn í Haukadal 1.maí 30.sep
Hraunhafnarvatn á Melrakkasléttu 1.maí 30.sep
Kleifarvatn í Breiðdal 1.maí 30.sep
Laxárvatn 1.maí 30.sep
Mjóavatn í Breiðdal 1.maí 30.sep
Sléttuhlíðarvatn í landi Hrauns 1.maí 20.sep
Sænautavatn á Jökuldalsheiði 1.maí 20.sep
Úlfljótsvatn – Vesturbakkinn 1.maí 30.sep
Vatnsdalsvatn í Vatnsfirði 1.maí 20.sep
Æðarvatn á Melrakkasléttu 1.maí 30.sep

Einnig viljum við minna veiðimenn á að skrá allan afla rafrænt með því að fara á vefslóðina: veidikortid.is/veidiskraning

Kæru veiðimenn, vonandi eigið þið góðan dag við vötnin á þessum baráttudegi verkalýðsins.

Með veiðikveðju,

Veiðikortið

2022 2022 Fréttir

Elliðavatn opnar fyrir veiði á morgun – sumardaginn fyrsta!

Sumarið er að bresta á og veiðimenn fagna sumri í Elliðavatni á morgun, sumardaginn fyrsta.

Það er fín veðurspá fyrir morgundaginn, léttskýjað með hugsanlegum dropum seinnipartinn og hiti frá 7-13° yfir daginn. Þetta ættu að vera kjöraðstæður fyrir veiðiskap og því tilvalið að fjölmenna og fagna sumarkomunni við Elliðavatnið.

Minnum veiðimenn á vinsamleg tilmæli um að sleppa aftur veiddum laxi í sumar og að sjálfsögðu er mjög mikilvægt að sleppa niðurgöngulaxi (hoplaxi) sem gæti veiðst í vatninu í apríl en hægt er að þekkja þá að því að þeir eru jafnan mjög grannir.

Einnig viljum við minna á að aðeins er heimilt að veiða í Hólmsá á flugu og veiðibann er í Suðurá sem rennur út í Helluvatn.


Hér fyrir ofan er mynd af Ásgeiri, syni hans og Aðalsteini en þeir hafa jafnan verið mættir fyrstir á bakkann við opnun og oftast fengið fyrsta fiskinn úr vatninu ár hvert.  Í fyrra var frekar kalt á sumardaginn fyrsta og fáir veiðimenn við veiðar. Það má búast við mun fleiri veiðimönnum á morgun enda veðurspáin mjög góð.

Hér er hlekkur á upplýsingasíðu vatnsins.

Hér er hlekkur á veiðiskráninguna.

Þeir sem eru ekki ætla að kaupa Veiðikortið geta keypt stakan dag hér.

Gleðilegt sumar!

Veiðikortið

2022 Fréttir

Meðalfellsvatn opnaði fyrir veiði í dag!

Í dag opnaði formlega fyrir veiði í Meðalfellsvatni. Vatnið er mjög þægilegt fyrir fjölskyldufólk enda aðkoma góð, stutt frá höfuðborgarsvæðinu og veiðilíkur fínar.  Margir veiðimenn sækja í vatnið snemmsumars enda veiðist talsvert af vænum fiskum þá.

Við viljum þó hvetja menn til að drepa ekki niðurgöngufiska og á það jafnt við um hoplax og sjóbirtinga á leið til sjávar. Þannig að ef að þú veiðir mjög grannan fisk, eru allar líkur á því að um niðurgöngufisk er að ræða og hann hentar ekki vel til átu.

Hér má sjá nánari upplýsingar um Meðalfellsvatnið.

Með kveðju,

Veiðikortið

2022 Fréttir

Kleifarvatn á Reykjanesi opnar fyrir veiði

Í dag, 15. apríl, opnar fyrir veiði í Kleifarvatn á Reykjanesi.  Það er algengt að stórurriðinn í vatninu taki einna best á vorin og má því gera ráð fyrir því að einhverjir séu orðnir spenntir að kíkja í vatnið.

Vötnin í Veiðikortinu opna svo eitt af öðru næstu daga, en í næstu viku opnar til að mynda fyrir veiði í Meðalfellsvatni, Elliðavatni og Þingvallavatni.

Gleðilega páska og við hvetjum veiðimenn til að póst myndum á samfélagsmiðla með myllumerkinu #veiðikortið auk þess sem við minnum á veiðiskráninguna.

Hér fyrir neðan er mynd af Adrian Mazik sem fékk þennan 68 sm urriða í Kleifarvatni í maí í fyrra.

Hér fyrir neðan er hlekkur í upplýsingasíðuna fyrir Kleifarvatn þar sem má skoða fleiri myndir, reglur og fleira sem tengist vatninu.

Með páskakveðju,

Veiðikortið

Kleifarvatn á Reykjanesi

2022 Fréttir

Vatnakvöld Veiðikortsins – Þingvallavatn

Vatnakvöld Veiðikortsins – Þingvallavatn

<< Hér er hlekkur á viðburðinn á Facebook >>

Fimmtudaginn n.k. 31. mars kl. 20-22 verður haldið Vatnakvöld Veiðikortsins í Ölveri í Glæsibæ þar sem farið verður yfir þjóðgarðssvæðið í Þingvallavatni. Við hvetjum áhugasama um að mæta tímanlega til að tryggja sér gott borð og jafnvel snæða af grillinu! Það er frítt inn að sjálfsögðu og nóg af bílastæðum!

Jakob Sindri Þórsson þekkir Þingvallavatnið mjög vel enda veiðir hann þar gríðarlega mikið. Í fyrrasumar veiddi hann um 40 daga við vatnið og er hann bæði að veiða urriðann og bleikjuna og stundar hann veiðar í vatninu frá opnun til loka tímabilsins. Jakob Sindri verður með fyrirlestur á Vatnakvöldinu sem aðdáendur Þingvallavatns ættu alls ekki að láta framhjá sér fara.

Hann mun kynna þjóðgarðssvæðið í Þingvallavatni fyrir veiðimönnum og skiptir veiðisvæðinu upp í svæði og tímabil þannig að veiðimenn fá tækifæri til að soga í sig margra ára þekkingu á einu kvöldi. Einnig mun hann sýna flugur sem virka og fara vel yfir veiðiaðferðir sem virka þannig að þeir sem ekki hafa náð beintengingu við vatnið ættu að vera í betri málum eftir að hafa hlustað á Jakob Sindra.

Það má segja að þessi kynning dekki Þingvallavatn 101, 202 og 303 þannig að byrjendur sem lengra komnir munu klárlega fá eitthvað fyrir sinn snúð.

Það er við hæfi, þar sem fyrirlesturinn fer fram á Sportbarnum Ölveri, að skipta fyrirlestrinum upp líkt og fótboltaleik en við stefnum á að hann verði í 2×45 mínútur, með stuttu hléi í hálfleik. Fyrirlesturinn hefst kl. 20:00 og ætti að ljúka um kl. 22:00.

Þeir sem vilja taka forskot á sæluna og kynnast Jakobi Sindra þá bendum við á viðtal við kappann á hlaðvarpinu Þrír á stöng en þáttinn má nálgast hér:  https://open.spotify.com/episode/4NUOtJBHE4CqdjV10cXdya?si=NVMx7dRoRZ-jIfVYtoGYnQ&context=spotify%3Ashow%3A6uJd3LrdMBpNhy73FpV3n5&fbclid=IwAR3wFC1ceAeC9utrV78Bi2nxs4aa_a1hWv7_v-NJUgmxxVTHiMFcxh5Ok50&nd=1
Auk þess má skoða Instagram síðu hans: https://www.instagram.com/jakobflyfishing/ en þar má finna margar myndir og myndbönd þar sem heyra má hvin í veiðihjólum og þegar fiskur tekur fluguna hjá honum.

Einnig bendum við á veiðimyndbönd sem hann hefur verið að gera og fjalla flest um Þingvallavatn og þjóðgarðssvæðið: https://youtube.com/channel/UCQMUhxvXTPb-3vAuc0PkfGA

Við hvetjum áhugamenn sem vilja tryggja sér góð sæti að mæta extra snemma og nýta þjónustu Ölvers og snæða þar kvöldmat. Hér er hlekkur á matseðilinn: https://www.sportbarinn.is/matse%C3%B0ill

2022

Fluguveiðitímabil með flugustöngum!

Við viljum leggja sérstaka áherslu á að aðeins er heimilt að veiða með flugu og flugustöng á fluguveiðitímabilinu í Þingvallavatni sem stendur yfir frá 20. apríl – 1. júní. Þá er einnig skylda að sleppa veiddum urriða.

Eftir 1. júní er heimilt að veiða með flugu, maðki og spún.

Það er farið að styttast í veiðitímabilið eða innan við mánuður!

Með veiðikveðju,
Veiðikortið

2022