Category: 2011

15. okt. 2011

 

Myndasyrpa frá Urriðadansi 2011 – þvílík tröll!

Það var margt um manninn á Þingvöllum í morgun þegar Laxfiskar og Þjóðgarðurinn á Þingvöllum stóðu fyrir árlegri göngu um heimkynni urriðans en gangan nefnist með rentu Urriðadans!

Hér fyrir neðan má sjá skemmtilegar myndir sem Cezary sendi okkur og þökkum við honum fyrir að gefa þeim sem ekki komust tækifæri til að upplifa stemninguna.  Myndir sýna og sanna hversu vígalegar skepnur urriðinn er.

Birkir Már var að veiða á Þingvöllum, nánar tiltekið í Lambhaganum þann 13. ágúst með föður sínum og frænda.  Þegar þeir voru að því komnir að hætta veiðum, þar sem sólin var að setjast, þá tók þessi fallegi urriði spúninn nánast þegar hann lenti á vatnsborðinu.

Héðan og þaðan

Það má segja að farið sé að síga á seinni hlutann í vatnaveiðinni þetta árið.  Menn eru þó ennþá að fá fiska í vötnunum og hvetjum við veiðimenn til að nýta tímann meðan veðrið er í lagi. 

 Lárus Lárusson fór í Meðalfellsvatn í gær ásamt félaga sínum og fengu þeir 6 urriða sem fengust á Svartan Nobbler og Zulu Nobbler.  Það virðist vera mikið líf í vatninu.  Hér má sjá nokkrar myndir frá Lárusi en þeir veiddu bæði úr bát og frá landi: 

Hlynur Jensson fékk fallega 11 punda hrygnu í Vatnsdalsvatni vestur í Vatnsfirði þann 6. ágúst síðastliðin.  Laxinn tók svartan Toby inn við Lambagil.

Einnig hefur verið að veiðast einhverjir laxar í Þórisstaðavatni og Meðalfellsvatni. 

Hér fyrir neðan má sjá myndir af Hlyni með laxinn.

10. ágú. 2011

 

Kleifarvatn – ekki bara bleikjuveiði núna!

Það er greinilega mjög misjafn hvaða tegundir menn eru að fá eftir því hvaða agn er notað sem og eftir því hvar í vatninu menn eru að veiða.  Þann 1. ágúst fékk Halldór glæsilega bleikjuveiði þar sem stærsta bleikjan var um 5 pund. 

03. ágú. 2011

 

Fín bleikjuveiði í Kleifarvatni.

Halldór Gunnarsson skellti sér í Kleifarvatnið 1. ágúst og fékk mjög fallegar bleikjur á Peacock púpu með kúluhaus.  Bleikjurnar voru allt upp í 5 pund (2,4 kg).

Hér fyrir neðan má sjá myndirnar og við þökkum Halldóri fyrir að deila þeim með okkur.

Nú eru kjöraðstæður í vatnaveiðinni og eru menn að fá fína veiði í flestum vötnunum innan Veiðikortsins.  Við höfum heyrt af veiðimönnum héðan og þaðan og það virðist vera mjög góð veiði hvert sem litið er. 

Óttar Þór Ólafsson fór til veiða með fjölskyldu sinni á leið þeirra um Melrakkasléttuna og fengu þau fína veiði og má sjá veiðina á myndinni hér fyrir neðan:

Það er alltaf gaman að fá skemmtilegar veiðimyndir.  Sigurbjörg Jóhanna er greinilega komin með lag á að veiða Þingvallableikjuna, en hún tók þessar tvær fallegu bleikjur þar þann 5. júlí s.l. í 17° hita kl. 8 um morguninn.  Það er fátt sem toppar fallegan morgunn á Þingvöllum þegar bleikjan er á svæðinu.

Það er góð veiði í vötnunum þessa dagana.  Þorgils Bjarni skellti sér á Þingvelli í landi Ölfusvatns í gær og fékk þennan  fallega 14 punda urriða á svartan Toby.

Við höfum fengið fregnir og myndir frá veiðimönnum sem hafa verið að veiða í vötnunum.

Bleikjan í Þingvallavatni er farin að sýna sig í meira mæli og hafa veiðimenn verið að fá flottar bleikjur.  Lárus fékk t.d. þessa fallegu 4 punda bleikju hér fyrir neðan á Öfugsnáðanum á litla púpu sem hann fékk í þjónustumiðstöðinn á Þingvöllum.