Ballið er að byrja! Vötnin opna á morgun.

Nú lifnar yfir veiðimönnum enda alltaf fagnaðefni þegar veiðitímabilið hefst formlega.

Mörg skemmtileg vötn opna formlega á morgun og má þar nefna Vífilsstaðavatn, Meðalfellsvatn og vötnin í Svínadal, þ.e.a.s. Þórisstaðavatn, Eyrarvatn og Geitabergsvatn. Hraunsfjörður opnar einnig á morgun en þar geta veiðimenn gert fína veiði snemma á vorin. Einnig opna vötnin Þveit og Syðridalsvatn við Bolungavík. 

Svo virðist sem flest vötn séu orðin veiðanlega enda lítill sem enginn ís á flestum þeirra. 

Veðurspáin er þó kuldaleg en vonandi verður veðrið fallegt þannig að menn geti látið sig hafa það að kasta fyrir silung á þessum hátíðardegi veiðimanna.

Við hvetjum veiðimenn sem verða á veiðum á morgun að senda okkur fréttir og einnig að nota #veiðikortið2015 á Instagram og Twitter.  Einnig er einfalt mál að senda myndir beint af bakkanum inn á Facebook síðu okkar þannig að veiðimenn geti séð hvernig staðan er frá fyrstu hendi.

Hér fyrir neðan koma nokkrar myndir frá opnuninni í fyrra:

Fjölmenni var við bakka Vífilsstaðavatns 1. apríl 2014. Það verður gaman að sjá hvernig gengur á morgun.

Veiðikonurnar og systurnar Kristín og Vilborg Reynisdætur voru klárar í slaginn í fyrra.

Það getur skipt sköpum að vera vel birgur af flugum þegar silungurinn er vandlátur.

Hér má einnig skoða fréttina sem við birtum í fyrra eftir opnunina í Vífilsstaðavatni 2014.

Góða skemmtun kæru veiðimenn og til hamingju með að nýtt veiðitímabil sé að ganga í garð – ballið er að byrja!

Veiðikortið