Author: admin

Það er greinilegt að margir eru að ferðast innanlands í sumar.  Fleiri veiðimenn hafa a.m.k. heimsótt vötnin innan Veiðikortsins miðað við sama tíma í fyrra, a.m.k. miðað við tilfinningu veiðiréttareigenda. 

Þingvallavatnið hefur verið þétt setið og menn eru að fá fínar bleikjur, þrátt fyrir að murtan sé mikið á ferðinni.   Ef menn eru á bleikjuslóð og verða einungis varir við murtu getur verið ágætt að reyna að veiða neðar, þ.e.a.s. að láta fluguna eða agnið sökkvar dýpra.  Þá eru jafnan meiri líkur á að fá stærri kuðungableikjur.

19. júl. 2009

 

Enn veiðast fallegir urriðar!

Þrátt fyrir að urriðinn er ekki eins mikið við landið og á fyrri hluta sumars, þá er lengi von á einum.  Rögnvaldur Rögnvaldsson fékk einn 7 punda urriða þar 15. júlí.

Nú er ákjósanlegur tími til að veiða bleikjuna, ef mönnum þykir veðrið ekki vera of gott! 

Hér fyrir neðan má sjá glæsilegar myndir sem við fengum sendar frá Brandi.  Við þökkum kærlega fyrir myndirnar og hvetjum menn til að skoða þetta skemmtilega vatnasvæði.

Read more “Héðan og þaðan 5. júlí 2009”

Inga Dóra Halldórsdóttir og fjölskylda skelltu sér í fjölskylduferð í Sléttuhlíðarvatn fyrir norðan.  Þau fengu 48 fiska á laugardaginn og 58 á sunnudaginn.  Flestir fiskarnir voru veiddir á spún og af bát.

Stærðin á fiskunum voru frá tæpu pundi upp í 2 pund þeir stærstu.

Austurlandið:

Fengum fréttir frá Sigurberg Guðbrands og félögum sem byrjuðu í Víkurflóði og fengu þar 45 cm ál!  Eftir Víkurflóð fóru þeir í Þveit við Höfn í Hornafirði.  Þar fengu þeir 7 sjóbirtinga og meðan þeir voru þar var veiðimaður að draga á land 4 punda birting.   Einnig kíktu þeir félagar í Urriðavatn við Egilsstaði og fengu þar 4 bleikjur á bilinu 1-4 pund og misstu tvær um 2 pund.  Við eigum von á myndum frá þeim félögum þegar þeir koma í bæinn seinna í vikunni, en þeir munu væntanlega prufa fleiri vötn innan Veiðikortsins á leiðinni heim, en þeir eru að fara að veiða í Jöklu og Fögruhlíðará.

 

Björgvin Guðmundsson skaust eina kvöldstund í Úlfljótsvatn og fékk pattaralega bleikju á fluguna.

Það er fínn lofthiti og bleikjan farin að veiðast í auknum mæli við landið.  Hvetjum því menn til að nota góða veðrið og skella sér í veiði.  Í dag er veiðidagur fjölskyldunnar, þannig að það er frítt í fjölda veiðivatna vítt og breitt um landið.  Sjá eldri frétt um Veiðidag fjölskyldunnar.

Þeir eru fallegir urriðarnir úr Þingvallavatni

Þeim fer fækkandi urriðafréttunum í bili, en þó er einn og einn sem veiðist.  Þann 17. júní fékk Rob Kasma þennan fallega urriða í Þingvallavatni.  Fiskurinn vóg 10-11 pund.

Nú eru vötnin heldur betur lifnuð við.  Margir hafa lagt leið sína í vötnin síðustu daga og er bleikjan farin að taka við sér.  Eitthvað er ennþá að veiðast í vötnunum af urriða, þrátt fyrir að það hafi heldur dregið úr því.  Menn hafa verið að fá fallega urriða í Úlfljótsvatni og Þingvallavatni svo dæmi séu tekin.  Nú er bleikjan að taka völdin!

08. jún. 2009

 

Héðan og þaðan síðustu daga.

Hér fyrir neðan er smá samantekt á innsendum fréttum.  Við viljum enn og aftur hvetja veiðimenn til að senda okkur veiðifréttir og einnig eru myndir alltaf skemmtilegar með á netfangið veidikortid@veidikortid.is