Fréttir

Read more “Héðan og þaðan 5. júlí 2009”

Inga Dóra Halldórsdóttir og fjölskylda skelltu sér í fjölskylduferð í Sléttuhlíðarvatn fyrir norðan.  Þau fengu 48 fiska á laugardaginn og 58 á sunnudaginn.  Flestir fiskarnir voru veiddir á spún og af bát.

Stærðin á fiskunum voru frá tæpu pundi upp í 2 pund þeir stærstu.

Austurlandið:

Fengum fréttir frá Sigurberg Guðbrands og félögum sem byrjuðu í Víkurflóði og fengu þar 45 cm ál!  Eftir Víkurflóð fóru þeir í Þveit við Höfn í Hornafirði.  Þar fengu þeir 7 sjóbirtinga og meðan þeir voru þar var veiðimaður að draga á land 4 punda birting.   Einnig kíktu þeir félagar í Urriðavatn við Egilsstaði og fengu þar 4 bleikjur á bilinu 1-4 pund og misstu tvær um 2 pund.  Við eigum von á myndum frá þeim félögum þegar þeir koma í bæinn seinna í vikunni, en þeir munu væntanlega prufa fleiri vötn innan Veiðikortsins á leiðinni heim, en þeir eru að fara að veiða í Jöklu og Fögruhlíðará.

 

Björgvin Guðmundsson skaust eina kvöldstund í Úlfljótsvatn og fékk pattaralega bleikju á fluguna.

Það er fínn lofthiti og bleikjan farin að veiðast í auknum mæli við landið.  Hvetjum því menn til að nota góða veðrið og skella sér í veiði.  Í dag er veiðidagur fjölskyldunnar, þannig að það er frítt í fjölda veiðivatna vítt og breitt um landið.  Sjá eldri frétt um Veiðidag fjölskyldunnar.

Þeir eru fallegir urriðarnir úr Þingvallavatni

Þeim fer fækkandi urriðafréttunum í bili, en þó er einn og einn sem veiðist.  Þann 17. júní fékk Rob Kasma þennan fallega urriða í Þingvallavatni.  Fiskurinn vóg 10-11 pund.

Nú eru vötnin heldur betur lifnuð við.  Margir hafa lagt leið sína í vötnin síðustu daga og er bleikjan farin að taka við sér.  Eitthvað er ennþá að veiðast í vötnunum af urriða, þrátt fyrir að það hafi heldur dregið úr því.  Menn hafa verið að fá fallega urriða í Úlfljótsvatni og Þingvallavatni svo dæmi séu tekin.  Nú er bleikjan að taka völdin!

08. jún. 2009

 

Héðan og þaðan síðustu daga.

Hér fyrir neðan er smá samantekt á innsendum fréttum.  Við viljum enn og aftur hvetja veiðimenn til að senda okkur veiðifréttir og einnig eru myndir alltaf skemmtilegar með á netfangið veidikortid@veidikortid.is

Þrátt fyrir að bleikjan sé ekki almennt komin á fullt í Þingvallavatni, þá er ljóst að hún er aðeins farin að sýna sig.

Halldór Páll Kjartansson og Birgir veiðifélagi hans skelltu sér í þjóðgarðinn 21. maí til að reyna við bleikjuna á Öfugsnáðanum. Þeir byrjuðu að veiða kl. 8 um morguninn en fengu ekki högg fyrr en um hálf þrjú.  Þeir fengu 11 bleikjur og hirtu 8.  Það var frábært veður og fallegur dagur.

Það er fallegt í Fljótunum. 

Sléttuhlíðarvatn er rétt norðan við Hofsós, en þó er ekki nema um hálftíma keyrsla þangað frá Varmahlíð.  Ef menn eru á norðuleið þá hvetjum við fólk til að kíkja þangað en yfirleitt er mikið líf þar og gaman fyrir fjölskylduna að renna fyrir fiski þar.  Einnig má benda á að hægt er að leigja gistinu í húsi sem búið er að standsetja rétt við vatnið hjá Magnúsi á Hrauni.