Category: 2021

Sumarhátíð við Elliðavatn sumardaginn fyrsta!

Veiðikortið, SVFR, Skógræktarfélag Reykjavíkur og Veiðifélag Elliðavatns standa fyrir sumarhátíð veiðimanna.

Dagskráin verður í höndum fræðslunefndar og Ungmennafélags SVFR auk Skógræktarfélags Reykjavíkur þar sem margt skemmtilegt og fræðandi verður í boði fyrir börn og fullorðna.
Aðilar frá SVFR verða veiðimönnum innan handar og veita góð ráð milli 11-13. Hvetjum alla til að taka með sér veiðistangir. Þeir sem vilja taka þátt í skemmtilegum pödduratleik mega taka með sér krukku og sílaháf en eitthvað verður þó til á staðnum. Veiðifélag Elliðavatns býður upp á veiði í vatninu meðan hátíðin stendur yfir.

Dagskrá:

Kl. 10:00 – 11:00 Veiði og lífríki Elliðavatns
Caddisbræður og Óli Urriði verða með sína árlegu fræðslukynningu og umræðu. Sérstakir gestir verða Örn Hjálmarsson og fleiri Elliðavatnssnillingar.

Kl. 11:00 – 12:00 Skógarþrautir
Skógarþrautir með Skógræktarfélagi Reykjavíkur. Varðeldur og sykurpúðar ef gróður verður ekki of þurr.

Kl. 12:00 – 13:30 Veiðihátíð krakkanna

Kl. 12:00 Fræðsluefni fyrir börn á myndrænu formi sem er unnið af Óla Urriða.
Kl. 12:30 Lífríkið skoðað, léttur og skemmtilegur ratleikur við Elliðavatnsbæinn.
Kl. 13:00 Grillaðar pylsur.

Vinsamlegast kíkið á viðburðinn á FB – þar sem hægt er að skrá sig.

Gleðilegt sumar og góða skemmtun!

Páskaveiði um helgina og fleiri vötn að opna fyrir veiði!

Gleðilega páska kæru veiðimenn,

Í morgun opnaði fyrir veiði í Meðalfellsvatni en vatnið er jafnan sérlega gott vorveiðivatn. Eftir óvanalega gott vor má ætla að margir veiðimenn leggi leið sína í vatnið. Við minnum veiðimenn á að skrá í bók og að sleppa öllum niðurgöngulaxi.

Á morgun, páskadag, hefst veiði í Þingvallavatni fyrir landi þjóðgarðsin á Þingvöllum og því tilvalið fyrir veiðimenn að skella sér þangað og reyna við stórurriðann. Við minnum á að það má aðeins veiða með flugu og flugustöng til 1. júní og öllum urriða skal sleppt.

Einnig má benda á að Kleifarvatn opnaði fyrir stuttu fyrir veiði og Gíslholtvatn er skemmtilegt í apríl. Vötnin á Snæfellsnesi eru einnig frábær valkostur og má þar benda á Hraunfjörðinn og Hlíðarvatn í Hnappadal.

Einnig viljum við minna veiðimenn á að skrá afla í rafrænu veiðibókina.

Góða skemmtun!

Kleifarvatn opnar fyrir veiði 15. apríl

Nú er veiðitímabilið komið á fullt og vötnin opna fyrir veiði eitt af öðru.

Á morgun 15. apríl hefst veiði í Kleifarvatni á Reykjanesi en það er steinsnar frá Hafnarfirði.

Góða skemmtun!

Veiðikortið

Veiðikortið 2024 komið út!

Veiðikortið 2024 er komið út og því er hægt að lauma því í jólapakka landsmanna.

Með Veiðikortinu má veiða í 36 vatnasvæðum vítt og breitt um landið fyrir aðeins kr. 9.900.- og rétt er að benda á að mörg stéttarfélög niðurgreiða kortið til sinna félagsmanna.

Litlar breytingar verða á vatnasvæðum á milli ára, en Leirvogsvatn í Mosfellsbæ bætist við en á móti detta út vötnin í Breiðdal, Mjóavatn og Kleifarvatn.

Hæg er að kaupa Veiðikortið 2024 bæði rafrænt eða sem gamla góða plastkortið og fá það sent heim án aukakostnaðar.

Stórveiðimaðurinn Bjarki Bóasson prýðir forsíðu Veiðikortsins 2024, en hann hefur verið duglegur að veiði á vötnum Veiðikortsins síðustu ár. Hægt er að fletta bæklingnum rafrænt hér:

Með kveðju,

Veiðikortið

Vatnaveiðin að komast á fullt!

Nú er einn besti tími vatnaveiðinnar að nálgast en hann er jafnan frá miðjum júní fram í ágúst. Þá er lífríkið komið á fullt og silungar synda nær landi í ætisleit.

Fín veiði hefur þó verið það sem af er sumri.  Elliðavatn hefur verið mjög áberandi enda búið að vera með eindæmum góð veiði þar, jafnt á urriða og boltableikjum.Við höfum heyrt af góðri veiði í Hlíðarvatni í Hnappadal, Hreðavatni, Baulárvallarvatni og Meðalfellsvatni. Óvenju rólegt hefur verið í Þingvallavatni í bleikjuveiðinni en þó einn og einn að fá vænar bleikjur þar og enn eru menn að setja í urriða þar. Sama má segja um Úlfljótsvatn, en þar hafa einnig verið að veiðast vænar bleikjur.

Vötnin fyrir norðan hafa einnig verið að gefa góða veiði en við höfum haft fréttir af fínni veiði í Ljósavatni, Vestmannsvatni og líka Svínavatni.

Við hvetjum veiðimenn til að fylla út veiðiskráningarformið okkar á netinu, en það má finna á veidikortid.is/veidiskraning.

Góða skemmtun í vötnunum í sumar!

Með veiðikveðju,

Veiðikortið

Veiðitímabilið er handan við hornið

Þrátt fyrir óvenju kalt vor virðast vera hlýindi í kortunum fyrir næstu helgi.

Við munum fylgjast vel með hvort að ísinn á Vífilsstaðavatni muni hopa í tíma þannig að veiðimenn geti opnað tímabilið formlega næsta laugardag sem er 1. apríl.

Það eru hverfandi líkur á að önnur vötn verði tilbúin en vorið er á næsta leiti og veiðimenn þurfa vonandi ekki að bíða lengi eftir að vatnveiðin fari í gang.

Með kveðju,

Veiðikortið

Veiðitúr á Skagaheiði – enn hægt að leigja hús

Skagaheiðin í landi Hvalness er vinsæll áfangastaður veiðimanna og jafnan góð veiði. Hægt er að veiða í 7 veiðivötnum og lækjum sem renna á milli vatnanna.  Það er búið að vera fín veiði þar í sumar.

Einnig er hægt að leigja veiðihús við vatnið en tvö hús eru við Ölvesvatn þar sem er gisting er fyrir 6-8 manns.  Við heyrum í Bjarna í Hvalnesi fyrir skömmu og þá var enn hægt að komast að í húsunum. Þeir sem vilja tryggja sér leigu  eða kanna með lausa daga er bent á að hafa beint samband við Bjarna Egilsson, í síma 893-7756 eða með því að senda tölvupóst á hvalnes730@simnet.is

Það er góður tími á heiðinni að nálgast en þegar líður á sumarið fer fiskurinn í meira mæli í lækina á milli vatnanna þar sem gaman er að egna fyrir þá með þurrflugu eða púpum.

Við vekjum athygli á því að á vatnasvæðið er takmarkaður fjöldi stanga, þannig að nauðsynlegt er að skrá komu sína áður en veiðimenn mæta á svæðið.

Með veiðikveðju,

Veiðikortið

Frábært byrjun í vatnaveiðinni!

Vatnaveiðin hefur farið vel af stað eins og veiðimenn hafa eflaust séð sem fylgja okkur á Facebook og Instagram. Þar reynum við að póst fréttum þegar þær gerast.

Elliðavatnið hefur sjaldan verið einn gjöfult í maí, a.m.k. síðustu árin.  Veiðimenn hafa verið að fá marga urriða um og yfir 50 cm.  Nýlega fór bleikjan að sýna sig er hún í sérstaklega góðum holdum.

Bleikjan er að vakna í Þingvallavatni, en urriðaveiðin þar hefur oft verið betri, þó svo þeir sem þekkja vel til hafa verið að fá einn og einn risaurriða. Það verður spennandi að fara í vatnið á næstu dögum og eldast við bleikjuna, en hún er mjög væn, sérstaklega þessar fyrstu sem mæta á svæðið. Einnig höfum við heyrt af veiðimönnum gera fína veiði í Úlfljótsvatni.

Kuldu og leysingar hafa orðið til þess að jafnan er meira vatn og kaldara í flestum ám og vötnum. Hraunsfjörður er þar engin undantekning, en þar virðist veiðin vera að fara eitthvað seinna í gang. Það má reikna með að veiðimenn eigi eftir að gera gott mót þar á næstunni og við fylgjumst vel með gangi mála þar.

Við viljum minna veiðimenn á að skrá allan veiddan fisk á vefsíðunni okkar, veidikortdi.is/veidiskraning og endilega sendið okkur fréttir og myndir til að deila gleðinni með öðrum veiðimönnum.  Einnig mælum við með að þú notir myllumerkið #veiðikortið þegar þú póstar þínum veiðiminningum á Instagram.

Vatnaveiðin er rétt að byrja! Góða skemmun!

Hér fyrir neðan er mynd frá Óskari Arnarsyni sem fékk þessa fallegu bleikju á Þingvöllum í vikunni og til hægri er mynd frá Daníel Egilssyni með veiði úr Elliðavatni fyrir örfáum dögum.

Með veiðikveðju,

Veiðikortið

Bæklingur Veiðikortsins 2022 á rafrænu formi

Bæklingur Veiðikortsins er kominn út á rafrænu formi. Það er alveg kjörið að skoða bæklinginn og skipuleggja veiðisumarið með Veiðikortinu.

Smelltu hér eða á myndina til að skoða bæklinginn fyrir Veiðikortið 2022.

Með veiðikveðju,

Veiðikortið